23 Oktyabr 2020

VERGİLƏR

SOSİAL-İQTİSADİ ONLAYN QƏZET

"Vergi islahatları: birlikdə kölgədən işıqlığa doğru" mövzusunda konfrans davam edir

Fevralın 11-də vergi xidməti işçilərinin peşə bayramı münasibətilə konfrans keçirilib. Tədbirdə vergi orqanlarının əməkdaşları, dövlət qurumlarının, qeyri-hökumət təşkilatlarının, sahibkarların ictimai birliklərinin nümayəndələri, iqtisadçı ekspertlər və iş adamları iştirak ediblər.

Konfransda İqtisadiyyat naziri Mikayıl Cabbarov "Vergi islahatları: birlikdə kölgədən işıqlığa doğru" mövzusunda, Vergilər nazirinin müavini İlkin Vəliyev isə "Vergi inzibatçılığında şəffaflığa aparan yol" mövzusunda təqdimatla çıxıb ediblər.

Tədbirdə Azərbaycanda Amerika Ticarət Palatasının ("AmCham") rəhbəri Nuran Kərimov "Kölgə iqtisadiyyatı" ilə mübarizə və şəffaflıq", "Millennium" turizm şirkətinin direktoru Ruslan Quliyev "Vergi sahəsində sahibkarlar üçün yaradılmış münbit şərait", Bakı Hesabat Mərkəzinin direktoru Mehdi Babayev "Şəffaf uçot, asan hesablama, dürüst hesabatlılıq vergi inzibatçılığının əsas istiqaməti kimi", "Unimetal" MMC-nin direktoru Rüfət Əzizov "Vergi siyasətinin investisiya mühitinə təsiri", AMEA-nın müxbir üzvü, professor Akif Musayev "Vergi orqanı: dünən, bu gün" mövzusunda çıxış ediblər.

Natiqlər ölkədə yaranmış yeni iqtisadi şəraitdə biznes mühitinin daha da yaxşılaşdırılması və vergi inzibatçılığının təkmilləşdirilməsi istiqamətində Vergilər Nazirliyi tərəfindən həyata keçirilən tədbirləri müsbət qiymətləndiriblər, iqtisadiyyatın şəffaflaşdırılması məqsədilə aparılan islahatlara dair təkliflər səsləndiriblər.

Sonra Azərbaycan Respublikasının İqtisadiyyat Nazirliyi yanında Dövlət Vergi Xidmətinin işçilərinin təltif edilməsi haqqında Azərbaycan Respublikası Prezidentinin Sərəncamı səsləndirilib.

Konfrans öz işini panel iclasında davam etdirir. İclasda İqtisadiyyat və Vergilər nazirliklərinin, Mərkəzi Bankın və Kiçik və Orta Biznesin İnkişafı Agentliyinin rəhbər vəzifəli şəxsləri tərəfindən iştirakçıların sualları cavablandırılıb, aktual məsələlər ətrafında müzakirələr aparılıb.