“Hazırda gənclərin karyerada yolunu açan iki mühüm amildən biri könüllülük, ikincisi isə təcrübədir. Təcrübə proqramları imkan verir ki, gənclər universitetdə qazandıqları nəzəri biliklərini təcrübədə sınasınlar”.

Bunu “vergiler.az”a İqtisadiyyat Nazirliyi yanında Dövlət Vergi Xidmətinin təşkil etdiyi Yay Təcrübə Proqramının məzunu olan İsa Əlili deyib.

Dövlət İdarəçilik Akademiyasında magistratura təhsili alan İ.Əlilinin sözlərinə görə, universitetdə qazandığı nəzəri bilik və bacarıqlarını Yay Təcrübə Proqramı vasitəsilə artıra biləcəyini düşündüyü üçün ötən il sənəd qəbulu elan edilən zaman bu proqrama qoşulmağa qərar verib və bir neçə mərhələdən uğurla keçərək proqramda iştirak hüququ əldə edib.

Karyeranın inkişafı üçün universitetdə öyrənilən biliklər
kifayət etmir. Bu bilikləri praktikada da tətbiq etmək lazımdır

İ.Əlilinin fikrincə, karyeranın inkişafı üçün universitetdə öyrənilən biliklər kifayət etmir. Bu bilikləri praktikada da tətbiq etmək lazımdır: “Mən bunu Yay Təcrübə Proqramında iştirak edən zaman gördüm. Bizə universitetdə vergi ödəyiciləri ilə işləyən zaman ortaya çıxan problemlər barədə praktiki məlumat verilmirdi, ancaq DVX-nin Yay Təcrübə Proqramında iştirak etdikdə vergi ödəyiciləri ilə qarşı-qarşıya oturaraq problemlərdən çıxış yollarını araşdırdıq, prosesin necə getdiyini praktikada müşahidə etdik”.

İ.Əlili vergi orqanlarında işləməyi özləri üçün hədəf seçənlərə Yay Təcrübə Proqramında iştirak etməyi tövsiyə edir: “2019-cu ildən vergi orqanlarında işləməyi özüm üçün hədəf qoydum və ona doğru irəlilədim. 2021-ci ildə magistraturaya qəbul oldum, magistraturada oxuya-oxuya vergi orqanlarında işə qəbula hazırlaşdım. İşə qəbul imtahanlarında uğurlu nəticə əldə etdiyim üçün tezliklə vergi orqanları sıralarına qoşulacağam”.

İlhamə İSABALAYEVA