“İqtisadiyyat Nazirliyi yanında Dövlət Vergi Xidmətinin təşkil etdiyi Yay Təcrübə Proqramını karyeramda irəliləmək üçün bir stimul olaraq dəyərləndirirəm”.

Bunu “vergiler.az”a həmin proqramın məzunu Aysun Bədəlova deyib.

Bakı Dövlət Universitetində hüquqşünaslıq ixtisası üzrə magistr təhsili alan, hazırda özəl şirkətlərdən birində hüquqşünas vəzifəsində çalışan A.Bədəlovanın sözlərinə görə, vergi orqanlarında işləməyə həmişə marağı olub. Yay Təcrübə Proqramında iştirak isə onun bu marağını daha da artırıb. “Yay Təcrübə Proqramında yeni təcrübə əldə etdiyimdən, bu, mənim vergi orqanlarında işləməyə olan həvəsimi daha da gücləndirdi”,- deyən A.Bədəlova bildirib ki, proqrama 2022-ci ilin iyul ayında qoşulub.

“Yay Təcrübə Proqramında yeni təcrübə əldə etdiyimdən, bu, mənim
vergi orqanlarında işləməyə olan həvəsimi daha da gücləndirdi”,-
deyən A.Bədəlova bildirib ki, proqrama 2022-ci ilin iyul ayında qoşulub

Sentyabradək davam edən proqrama qoşulmaqda əsas məqsədi vergi hüququnu öyrənmək, vergi sahəsində praktiki biliklərini inkişaf etdirmək, maliyyə hüququ sahəsində ilkin biliklər əldə etmək olub: “Mənim vergi sahəsinə marağım böyükdür. Bu proqrama qoşulmağı da özüm üçün bir şans saydım. İlkin biliklərimi formalaşdırdıqdan sonra vergi orqanlarına işə qəbul üçün imtahan vermək istəyirdim. Bu baxımdan Yay Təcrübə Proqramı mənim üçün bir üstünlük oldu. Proqram müddətində Şamaxıda bir həftəlik təlimdə iştirak etdim, daha sonra DVX-nin Lokal Gəlirlər Baş İdarəsinin müxtəlif şöbələrində 6 həftə ərzində təcrübə keçdim. Bu təcrübə müddətində mən bir çox sahələr üzrə yeni biliklərə yiyələndim”.

Artıq müvafiq qaydada imtahan verdiyini deyən A.Bədəlova tezliklə vergi orqanlarında işə başlayacağını söyləyib.

İlhamə İSABALAYEVA