Dövlət satınalmalarında qənaət edilən məbləğ açıqlanıb
2026-cı ilin yanvar-avqust ayları ərzində dövlət satınalmaları üzrə təsdiqlənən satınalmalar nəticəsində 453,7 milyon manat vəsaitə qənaət edilib.
Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin məlumatına görə, qənaət məbləği elektron satınalmalar üzrə müəyyən edilən ehtimal olunan qiymətlə təsdiq edilən qiymət arasındakı fərq əsasında hesablanır.
Bəhs edilən dövrdə ümumi qənaət faizi 14,4 faiz təşkil edib. Bu göstərici müsabiqə üzrə təsdiq edilən qiymətlə ehtimal olunan qiymət arasındakı fərqin ehtimal olunan qiymətə nisbətini ifadə edir.
Qeyd olunan nəticələr dövlət satınalmaları çərçivəsində rəqabət mexanizmlərinin tətbiqi, qiymətlərin optimallaşdırılması və dövlət maliyyə resurslarından səmərəli istifadənin təmin olunması baxımından əhəmiyyətli nəticələr əldə edildiyini göstərir.
