AFEZ və Çin şirkətləri arasında sənaye və investisiya əməkdaşlığı müzakirə olunub

Ələt Azad İqtisadi Zonasında (AFEZ) Sutsyan Xarici Ölkələrlə Dostluq Assosiasiyasının prezidenti Van Lyanyun və "Jiangsu Yongjia Investment Holding Group Co., Ltd." şirkətinin İdarə Heyətinin sədri Day Daolunun rəhbərlik etdiyi Çin nümayəndə heyəti ilə görüş keçirilib.

Ələt Azad İqtisadi Zonasının məlumatına görə, Heydər Əliyev Fondu ilə Xarici ölkələrlə dostluq üzrə Çin Xalq Assosiasiyası arasında əməkdaşlıq çərçivəsində təşkil olunan səfər sənaye, texnologiya, mühəndislik və tikinti sahələrində fəaliyyət göstərən Çin biznesinin nümayəndələrini bir araya gətirib.

AFEZ Səlahiyyətli Qurumunun İdarə Heyətinin sədri Valeh Ələsgərov zonanın regionun iri sənaye-logistika və investisiya habı kimi əhəmiyyətini vurğulayıb. Nümayəndə heyətinə AFEZ-in üstünlükləri, əlverişli investisiya mühiti, eləcə də nəqliyyat kommunikasiyaları, mühəndislik sistemləri və sənaye obyektləri daxil olmaqla infrastrukturu təqdim edilib.

Tərəflər əməkdaşlıq perspektivlərini, Çin şirkətlərinin AFEZ layihələrində iştirakını və birgə inkişaf prioritetlərini müzakirə edərək, dayanıqlı iqtisadi artım üçün tərəfdaşlığın möhkəmləndirilməsinin vacibliyini vurğulayıblar.