31 Oktyabr 2020

VERGİLƏR

SOSİAL-İQTİSADİ ONLAYN QƏZET

Banklar biznes kreditlərinin həcmini artırmalıdır

Mərkəzi Bankın məlumatına əsasən, sənaye və istehsal sektorlarına kredit qoyuluşları yanvar ayında 265 milyon 861 min manat artıb. Ümumi kredit qoyuluşları isə 15 milyard 513 milyon 610 min manata çatıb.

Azərbaycan Sahibkarlar (İşəgötürənlər) Təşkilatları Milli Konfederasiyasının vitse-prezidenti Vüqar Zeynalovun sözlərinə görə, biznesin inkişafı üçün banklar bu sahəyə daha çox kredit verməlidir: "Banklar biznes kreditlərini qısa müddətə illik 14-15 faizlə təklif edir. Əgər biz istehsalat, sənaye sektorunun inkişafını nəzərdə tuturuqsa, burada kreditlərin faiz dərəcəsi azaldılmalı, güzəşt müddəti ən azı 3-5 il, hətta 10 ilə qədər artırılmalıdır. Lakin banklar buna gedə bilmir, çünki onların özlərinin də uzunmüddətli maliyyə mənbələri yoxdur. Bizdə bankların vəsaiti əsasən əhalidən cəlb edilən əmanətlər hesabına formalaşır. Onların da müddəti qısamüddətli olur. Hesab edirəm ki, Mərkəzi Bank tərəfindən kommersiya bankları ucuz və uzunmüddətli vəsaitlə təmin edilməlidir.

Hazırda Azərbaycanda biznes kreditlərinin həcmi çox azdır. Sahibkarlara verilən kreditlər ümumi daxili məhsulun cəmi 10 faizi qədərdir. Bu göstərici ən azı 2-3 dəfə artırılmalıdır ki, ölkədə sənaye inkişaf etsin, yeni iş yerləri açılsın, iqtisadi inkişaf sürətlənsin".

Səbuhi TURAN