İpoteka və Kredit Zəmanət Fondu (İKZF) 2019-cu ili 18,641 milyon manat mənfəətlə başa vurub. Qurumun hazırladığı hesabata görə, bu, 2018-ci ilə nisbətən 3,5 faiz azdır. Ötən il İKZF-nin faiz gəlirləri 44,963 milyon manat (əvvəlki ilə nisbətən 6,3% az), faiz xərcləri 18,827 milyon manat (8,1% çox), dəyərsizləşmə üzrə zərəri 455 min manat (56,2% az), haqq və komissiya xərcləri 1,137 milyon manat (əvvəlki il gəlir olub), digər gəlirləri 1,293 milyon manat (11,3% az), insan resursları üzrə xərcləri 4,344 milyon manat (21,8% çox), inzibati və digər xərcləri isə 2,852 milyon manat (61%% çox) təşkil edib.

Bu il yanvarın 1-nə İKZF-nin aktivləri 1.406,159 milyon manat olub ki, bu da illik müqayisədə 10,15 faiz çoxdur. Bunun 998,079 milyon manatı ipoteka kreditləridir. 2019-cu ildə Fondun kredit portfeli 11,5 faiz böyüyüb.

Hesabat dövründə İKZF-in öhdəlikləri 1,4 faiz artaraq 754,278 milyon manata, o cümlədən borc öhdəlikləri 5,4 faiz artaraq 728,92 milyon manata, balans kapitalı isə 22,4 faiz artaraq 651,781 milyon manata, o cümlədən nizamnamə kapitalı 21,5 faiz artaraq 566 milyon manata çatıb.