Yaşıl enerji Azərbaycanın yeni inkişaf baxışının mərkəzində dayanır. Məqsədimiz aydındır, 2030-cu ilə qədər elektrik enerjimizin 30 faizini bərpaolunan enerji mənbələrindən istehsal etmək.

Bu barədə iqtisadiyyat nazirinin birinci müavini Elnur Əliyev Şuşada keçirilən 6-cı ECO biznes-forumunda çıxışı zamanı deyib.

“Biz Azərbaycan torpaqlarının beşdə birini təşkil edən işğaldan azad edilmiş ərazilərimizdə də təmiz enerjini inkişaf etdiririk. “Yaşıl Enerji Zonası” elan edilən bu region davamlılıq və dayanıqlılığa güclü diqqət yetirməklə yenidən qurulur. İnvestisiyanı təşviq etmək üçün biz 10 il müddətinə mənfəət, əmlak, torpaq və sadələşdirilmiş vergilərdən tam azadolmalar, eləcə də avadanlıq və materiallara görə ƏDV və gömrük rüsumlarından azadolmalar təklif edirik. ECO ölkələrindən olan tərəfdaşlarımız artıq bu torpaqların bərpası ilə məşğuldur və bu sahədə əməkdaşlıq genişlənməkdə davam edir. Bir sözlə, nəqliyyat və logistikadan tutmuş bərpaolunan enerji və infrastruktura qədər Azərbaycan ilə ECO ölkələri arasında daha dərin əməkdaşlığın təməli həmişəkindən daha güclüdür”, - deyə nazirin birinci müavini vurğulayıb.

AZƏRTAC