İndiyədək Körfəz ölkələri Azərbaycan iqtisadiyyatına 4 milyard ABŞ dollarına yaxın investisiya yatırıb.

Bunu İqtisadiyyat Nazirliyinin dəstəyi, Azərbaycan Respublikasının İxracın və İnvestisiyaların Təşviqi Agentliyinin (AZPROMO) təşkilatçılığı ilə keçirilən Azərbaycan - Körfəz Əməkdaşlıq Şurasına (KƏŞ) üzv ölkələrin 2-ci iqtisadi forumunda AZPROMO-nun icraçı direktoru Yusif Abdullayev deyib.

Onun sözlərinə görə, birinci forumun keçirildiyi 2017-ci ildə Azərbaycanla Körfəz ölkələri arasında ticarət dövriyyəsinin həcmi 69,5 milyon ABŞ dolları olub. 2023-cü ildə isə dövriyyənin həcmi 2,5 dəfə artaraq 175 milyon ABŞ dollarına çatıb: ”Amma potensial tam reallaşdırılmayıb. Hesab edirəm ki, bu forum perspektivə yenidən baxmağa imkan verəcək”.