Yaxın vaxtlarda Azərbaycan və İtaliya müxtəlif sahələrdə birgə müəssisələr yaradacaqlar. Bu barədə Romada jurnalistlərə İtaliya-Azərbaycan Ticarət Palatasının prezidenti Manuela Traldi bildirib.

“Biz azərbaycanlı həmkarlarımızla özəl sektor nümayəndələrinin iştirakı ilə çox faydalı və səmərəli görüşlər keçirdik. İtaliyanın sahibkarlıq naziri və Azərbaycanın iqtisadiyyat nazirinin iştirakı ilə yüksək səviyyəli dəyirmi masa da nəzərdə tutulub”, - deyə o bildirib.

Ticarət Palatasının işindən danışan M.Traldi qeyd edib ki, qurum Azərbaycana investisiyaların cəlb edilməsinə yönəlib. “Biz bunu müxtəlif yollarla edirik, Azərbaycanı İtaliyada tanıtmağa çalışırıq, İtaliya şirkətlərindən investisiya cəlb etməyə kömək edə biləcək bütün elementlərdən istifadə edirik. Biz ümidlərimizi Trans-Adriatik Boru Kəməri (TAP) layihəsinə bağlayaraq, hələ 2012-ci ildə İtaliya-Azərbaycan Ticarət Palatasını yaratdıq. Şəxsən mən əmin idim ki, TAP nə vaxtsa reallaşacaq və ölkələrimiz daha da yaxınlaşacaq”, - deyə Ticarət Palatasının prezidenti bildirib.

M.Traldi əlavə edib ki, bir neçə layihə üzərində iş gedir. “Bu kontekstdə biz Azərbaycanın investisiya şirkətləri, İxracın və İnvestisiyaların Təşviqi Agentliyi (AZPROMO) və İqtisadiyyat Nazirliyi ilə sıx əməkdaşlıq edirik. Hesab edirəm ki, perspektivlər çox böyükdür. Biz Azərbaycanda biznes mühitinə, istehsal mühitinə ən qabaqcıl İtaliya texnologiyalarını gətirəcək birgə müəssisələr yaradacağıq. Bu, iqtisadiyyatın daha da inkişafına və şaxələndirilməsinə töhfə verəcək”, - deyə o bildirib.

Ticarət Palatasının prezidenti qeyd edib ki, birgə müəssisələr yaradılarkən sənaye sektoruna, o cümlədən neft-kimyaya, eləcə də Azərbaycanın metallurgiya istehsalına və kənd təsərrüfatına üstünlük veriləcək.

“Azərbaycanda kənd təsərrüfatının gələcək inkişafına dəstək verəcək bir neçə layihəmiz var. Bundan əlavə, biz səhiyyə sektorunda, sənaye sektorunda, eləcə də İtaliyanın innovasiyaya malik olduğu digər sahələrdə yeni layihələr hazırlayırıq. Söhbət qida sənayesi, eləcə də dəri emalı, ayaqqabı istehsalı və toxuculuq kimi sektorlardan gedir”, - deyə o bildirib.

“Trend”