Dövrün tələblərinə uyğun olaraq, rəqəmsal kənd təsərrüfatının inkişafı prioritet istiqamətlərdən biri olaraq qalmaqdadır.

Bu barədə ulu öndər Heydər Əliyevin anadan olmasının və Türkiyə Cümhuriyyətinin yaradılmasının 100-cü ildönümünə həsr olunmuş Azərbaycan-Türkiyə İnvestisiya Forumu çərçivəsində təşkil olunan "Kənd təsərrüfatı və qida sənayesi sahələrində dialoq: cari çağırışlar və müasir həllər” adlı paneldə çıxış edərkən kənd təsərrüfatı naziri Məcnun Məmmədov deyib.

Onun sözlərinə görə, istifadəyə verilən kənd təsərrüfatı informasiya sistemi şəffaflıq prinsipi əsasında fermerlərə istənilən yerdə və istənilən vaxt mobillik elektron xidmətlərinə asan çıxış imkanları yaradır.

"Müasir metodlara əsaslanan elektron xidmətlər aqrar sahədə zaman itkisinin qarşısını alır, həmçinin fermer və sahibkarlara operativ xidmət göstərir. Əsas məqsədimiz milli kənd təsərrüfatı ərzaq sisteminin yaradılması, ətraf mühitin mühafizəsi, ərzaq təhlükəsizliyi, ticarətin inkişafı və sosial məsuliyyəti balanslaşdıran davamlı kənd təsərrüfatı yaratmaqdır",- deyə nazir qeyd edib.