İnternet bankçılıq vasitəsilə həyata keçirilən əməliyyatların həcmi 2023-cü ilin 9 ayı ərzində ötən ilin eyni dövrü ilə müqayisədə 15 faiz artıb və 172 milyard manata bərabər olub.

“vergiler.az” xəbər verir ki, bu fikri Mərkəzi Bankın baş direktoru Fərid Osmanov VII Beynəlxalq Bankçılıq Forumunda səsləndirib. Onun sözlərinə görə, iqtisadi subyektlərin ödənişlərinin həyata keçirilməsində internet bankçılıq və mobil bankçılıq xüsusi önəm kəsb etməkdədir.

“Mobil bankçılıq da kifayət qədər aktual olub. Mobil bankçılıq kanalları vasitəsilə həyata keçirilən əməliyyatların həcmi ötən ilin ilk 9 ayı ilə müqayisədə 2,4 dəfə artaraq 18,5 milyard manata çatıb. Qeyd etmək lazımdır ki, son illərdə istifadə etdiyimiz ödəniş kartların sayında və həmin kartlar vasitəsilə həyata keçirilən ödənişlərin həcmində də ciddi inkişaf trayektoriyasını görürük. 1 oktyabr 2023-cü il tarixinə olan göstəricilərə əsasən, ödəniş bazarında dövriyyədə olan kartların sayı 20 faiz artıb və 16 milyona çatıb”.