“Azərbaycanda sahibkarlığın inkişafı üçün göstərilən dəstəyə görə dövlətimizdən çox razıyıq. Dövlət ölkəmizdə sahibkarlığın inkişafı üçün hər cür şərait yaradıb, sahibkarlara güzəştli şərtlərlə kreditlər verir”.

Bunu “vergiler.az”a 5 ildir ki, Qubada intensiv bağçılığın inkişafı ilə məşğul olan "NİAB" MMC-nin rəhbəri İlqar Əliyev deyib. Onun sözlərinə görə, bağçılığın inkişafı məqsədilə Sahibkarlığın İnkişafı Fondundan ümumi investisiya dəyəri 7 795 713 manat layihənin maliyyələşdirilməsi üçün 2 000 000 manat kredit alıb: “Bizə göstərilən etimadı doğruldaraq kreditlərimizi vaxtlı-vaxtında ödəyirik. Bu vəsait bağçılığımızın inkişafına çox böyük yardım etdi. Dövlətin yardımı olmasaydı, bu gün bağımızda meyvə yetişdirib ərsəyə gətirə bilməzdik. Bu kredit bizə 32 yeni iş yerinin açılmasına da şərait yaratdı. İşçilərin əməkhaqları kart hesabı ilə ödənilir, bir sözlə, fəaliyyətimizi qanuni şəkildə davam etdiririk”.

İ.Əliyev qeyd edib ki, hazırda meyvələrini daxili bazarla yanaşı, Rusiya bazarına da çıxarırlar: “Bağımızda alma, gavalı, nektarin, armud, gilas yetişdiririk. Bizim meyvələrimiz hətta İngiltərəyə də göndərilir. Hazırda meyvələrimizin Avropa bazarlarına çıxarılması üçün beynəlxalq sertifikatlar almağa çalışır, xarici şirkətlərlə müqavilələr bağlayır, təklifləri dəyərləndiririk”.

İlhamə İSABALAYEVA