Prezident İlham Əliyev "Mikro, kiçik və orta sahibkarlıq subyektlərinin rəqabətqabiliyyətli istehsalının stimullaşdırılması məqsədilə daxili bazar araşdırmalarına dövlət dəstəyi göstərilməsi Qaydası"nın təsdiq edilməsi haqqında fərman imzalayıb. 

Bu qaydaların əsas məqsədləri KOB subyektlərinin rəqabətqabiliyyətli istehsalının stimullaşdırılması üçün onlara daxili bazarın mövcud vəziyyətinin öyrənilməsində maliyyə və informasiya dəstəyinin göstərilməsinə, özəl sektorda məhsul istehsalının artırılmasına, rəqabətqabiliyyətli məhsullar istehsal edən yeni müəssisə və obyektlərin yaradılmasına nail olmaqdır.

Qaydalara əsasən, dəstək tədbirlərinin təşkilini və dəstək məbləğinin ödənilməsini Kiçik və Orta Biznesin İnkişafı Agentliyi həyata keçirəcək. Hər bir daxili bazar araşdırmasının aparılmasına görə ödənilən məbləği 20 min manatdan artıq ola bilməz. Mikro sahibkarlıq subyektinin müraciəti əsasında aparılan hər bir daxili bazar araşdırmasına çəkilən xərcin 80 faizi maliyyələşdirilir, qalan hissəsini isə müraciət edən subyekt özü ödəməlidir.

Dəstək tədbiri dedikdə, daxili bazar tendensiyalarının iqtisadi, siyasi, texnoloji, hüquqi, sosial, bazar faktorlarının araşdırılması vasitəsilə öyrənilməsinin təşkili və maliyyələşdirilməsi, habelə bu sahədə müxtəlif təlimlərin və seminarların keçirilməsi, təlim prosesində informasiya dəstəyinin göstərilməsi nəzərdə tutulur. Azərbaycan Respublikasında vergi ödəyicisi kimi uçota alınmış və müəyyən edilmiş meyarlara cavab verən KOB subyektləri dəstəkdən yararlana biləcəklər. Daxili bazar araşdırmalarının aparılmasına "Dövlət satınalmaları haqqında" Qanuna uyğun olaraq bağlanmış müqavilə əsasında ixtisaslaşmış yerli və xarici hüquqi və fiziki şəxslər (fərdi sahibkarlar) cəlb ediləcək.

Qaydaların tam mətnini buradan əldə edə bilərsiz:
https://azertag.az/xeber/