Bu ilin yanvar-mart aylarında ölkədə 925 ədəd minik avtomobili istehsal olunub.

"vergiler.az"ın Dövlət Statistika Komitəsinin hesabatı əsasında apardığı hesablamalara görə, ötən ilin eyni dövrünün göstəricisi ilə müqayisədə avtomobil istehsalı 2,1 dəfə və ya 486 ədəd artıb.

Cari ilin fevral ayı ilə müqayisədə isə martda artım 79,7 faiz və ya 208 ədəd təşkil edib. Mart ayında ölkədə 469 minik avtomobili istehsal olunub. Aprel ayının 1-nə hazır məhsul ehtiyatı isə 813 avtomobil təşkil edib.

Qeyd edək ki, 2022-ci ildə ölkədə 2049 minik avtomobili istehsal olunub ki, bu da bir il öncəki göstəricini 0,3 faiz üstələyir.