Bolqarıstan və Azərbaycan Asiya ilə Avropa yük axınını daha da artırmaqda maraqlıdırlar.

“vergiler.az” Bolqarıstan mətbuatına istinadən xəbər verir ki, bunu Bolqarıstanın nəqliyyat və kommunikasiya nazirinin müavini vəzifəsini müvəqqəti icra edən Nikolay Naydenov Azərbaycanın rəqəmsal inkişaf və nəqliyyat nazirinin müavini Rəhman Hümmətovla keçirdiyi videokonfrans zamanı deyib.

Sofiya ilə Bakı arasında birbaşa nəqliyyat əlaqəsinin vacibliyini qeyd edən N.Naydenov bu istiqamətdə birbaşa hava əlaqəsinin bərpası ilə bağlı işlərin aparıldığını qeyd edib. “Biz birbaşa nəqliyyat əlaqələrinin vacibliyini dərk edirik və iki paytaxt arasında birbaşa uçuşların bərpası imkanlarının axtarışındayıq”, - N.Naydenov bildirib.

Tədbirə qatılan hər iki ölkənin aviasiya administrasiyalarının nümayəndələri bu məsələdə dəstək göstərməyə tam hazır olduqlarını bildiriblər. Görüşdə həmçinin Transxəzər Beynəlxalq Nəqliyyat Marşrutunun əhəmiyyəti qeyd edilib. Tərəflər əməkdaşlığın işlək modellərinin tapılması üçün Bolqarıstan və Azərbaycan qurumları arasında ekspert danışıqlarının təşkilinin zəruriliyi ifadə ediblər.