Sentyabrın 15-dək dövlət tərəfindən fermerlərə yazlıq əkinlərə görə 30 milyon manat subsidiya ödənilib.

Aqrar Kredit və İnkişaf Agentliyindən verilən məlumata görə, bu məbləğin 17 milyon manatı pambıq, 1 milyon manatı isə tütün və çəltik istehsalçılarına çatıb.

Yazlıq əkin bəyanı etmiş fermerlərin 99 faizi (50146 nəfər) subsidiya alıb. Bu fermerlərin 19515 nəfəri pambıq istehsalçısıdır.

Bu il süni mayalanma ilə cins buzov əldə etdiyinə görə 27910 fermerə 4 milyon 525 min 500 subsidiya ödənilib.

19 min nəfərə yaxın arıçıya dövlət 4 milyon manatdan artıq subsidiya ödəyib və 700 min manatadək vəsaitin ödənilməsi üçün də monitorinqlər aparılır.

Ölkəmizin 30 rayonundan olan 3382 kümçü istehsal müəssisəsinə 279 min 884 kiloqram barama təhvil verərək, 1,4 milyon manat məbləğində dövlət subsidiyası alıb.

Qeyd edək ki, 2020-ci ildən başlayaraq kənd təsərrüfatı məhsulları istehsalçılarına dövlət subsidiyaları Elektron Kənd Təsərrüfatı İnformasiya Sistemi (EKTİS) onlayn platforması üzərindən müraciət və təsdiq əsasında, Fermer Kartlarına köçürməklə verilir. Bu günədək EKTİS-də 519 min 674 fermer qeydiyyatdan keçib. Payızlıq və çoxillik əkinlər də daxil olmaqla, dövlət fermerlərə yeni qaydalarla 229 milyon manat subsidiya ödəyib.