16 İyun 2024

VERGİLƏR

SOSİAL-İQTİSADİ ONLAYN QƏZET

Sahibkarlar üçün yeni elektron xidmətlər və asan həllər yaradılır MƏQALƏ

  • Elektron satınalmalarda iştirak edən sahibkarlar tərəfindən müvafiq arayışın alınmasına dair müraciət yalnız portal vasitəsilə həyata keçiriləcək;

  • Arayışın elektronlaşdırılması dövlət satınalmalarında iştirak edən sahibkarlar üçün bir çox üstünlüklər deməkdir;

  • Xidmətlərin elektronlaşması regionlarda fəaliyyət göstərənlər üçün də səmərəlidir.

Sahibkarların fəaliyyətinin stimullaşdırılması üçün ölkəmizdə daha bir elektron xidmət fəaliyyətə başlayıb. Dövlət satınalmalarında iştirak edən sahibkarlara İqtisadiyyat Nazirliyi yanında Dövlət Vergi Xidməti tərəfindən arayışın təqdim olunması prosesi elektronlaşdırılıb. Nəticədə “etender.gov.az” portalında açıq tender və ya kotirovka sorğusu metodunu tətbiq etməklə elektron satınalmalarda iştirak edən sahibkarlar tərəfindən müvafiq arayışın alınmasına dair müraciət yalnız portal vasitəsilə həyata keçiriləcək və real vaxt rejimində dərhal təqdim olunacaq.

Yeniliyin mahiyyəti nədən ibarətdir?

Dövlət satınalmalarında iştirak edən sahibkarlar üçün arayışın elektron təqdim edilməsi Dövlət Vergi Xidməti tərəfindən təqdim edilən arayışın əldə edilməsi prosesini sadələşdirib. Əgər əvvəllər sahibkarlar bunun üçün vergi orqanlarına müraciət edirdilərsə, artıq bu mərhələ aradan qaldırılıb. Bir müddət əvvəl İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti Dövlət Vergi Xidməti ilə birlikdə dövlət satınalmalarında iştirak edən sahibkarlara qeyd olunan arayışın dövlət satınalmalarının vahid internet portalı (etender.gov.az) vasitəsilə verilməsi üçün inteqrasiyanı yekunlaşdırıb. Sahibkarlar tərəfindən müvafiq arayışın alınmasına dair müraciət bundan sonra yalnız “etender.gov.az” portalı vasitəsilə həyata keçiriləcək. Təqdim edilən arayışın müvafiq qanunun tələblərinə uyğunluğu portal vasitəsilə real vaxt rejimində yoxlanılacaq və istifadəçiyə dərhal məlumat veriləcək. Bu proses “etender.gov.az” portalında açıq tender və ya kotirovka sorğusu metodunu tətbiq etməklə elektron satınalma vasitəsilə keçirilən satınalmaları əhatə edir.

Sahibkarlar üçün prosedurlar sadələşdirilir

Sözügedən arayışın elektronlaşdırılması dövlət satınalmalarında iştirak edən sahibkarlar üçün bir çox üstünlüklər deməkdir. Belə ki, bu arayışı əldə etmək uzun müddət tələb edən və vaxt aparan prosedurlardan idi. Elektron formada keçirilən satınalmalarda iştirak edən sahibkarlar tərəfindən müvafiq arayışın elektron alınması isə bu sahədə aktivliyin artmasını təmin edəcək. Ümumiyyətlə, arayışların elektronlaşdırılması biznes mühitində müsbət tendensiyalara yol açır. Bu, ilk növbədə vaxta qənaət deməkdir. Sahibkar istənilən vaxt və istədiyi yerdən internet vasitəsilə arayış üçün müraciət edə bilir. O cümlədən elektron arayışı təqdim etmək üçün sənədləri toplamaq, hansısa idarəyə getmək və saatlarla növbə gözləmək məcburiyyəti aradan qalxır. Digər tərəfdən, elektronlaşma arayışın əldə edilmə prosesinin şəffaf olmasını təmin edir. Bu prosesin üstünlüklərindən biri də onun yoxlanması prosesinin qısa zaman ərzində - saniyələr sərf etməklə yerinə yetirilməsidir. Sənəd elektron formada yoxlanışdan keçərkən hansısa nüans dəqiq olmadıqda sistem dərhal xəta barədə məlumat verir.

Xidmətlərin elektronlaşması regionlarda fəaliyyət göstərənlər üçün də səmərəlidir. Çünki arayışı əldə etmək üçün paytaxta üz tutmağa və uzaq məsafə qət etməyə ehtiyac qalmır. Elektron arayış alan şəxslər sənədlərin sonrakı taleyi barədə də məlumat əldə etmək imkanına sahib olur. Elektron sistem üzərindən göndərilmiş sənədin icra olunması prosesini izləmək olur.

Göründüyü kimi, vergi sistemində rəqəmsal həllərin tətbiqi və xidmətlərin elektronlaşdırılması mühüm istiqamətlərdəndir. Davamlı olaraq həyata keçirilən bu proses biznes mühitini daha da əlverişli edir. Bu isə sahibkarların daha səmərəli və keyfiyyətli xidmətlərlə təmin edilməsi deməkdir.

Gülay NƏBİYEVA

VergiƏDV-dən azadolunma haqqında e-sertifikat kimlərə verilir? VergiSəhiyyə müəssisəsinə ianə edilən vəsaitlərə vergi güzəşti VergiMövsümi turizm fəaliyyəti ilə məşğul olan fiziki şəxsin vergi öhdəlikləri VergiTəhvil-təslim aktı itirildiyi halda alıcı həmin məbləğdən imtina edə bilərmi? VergiVergi ödəyicisi xarici ölkədəki bank hesabı ilə əməliyyatlar apardıqda hansı sanksiya ilə üzləşə bilər? VergiSosial şəbəkədən gəlir əldə edən şəxslərin vergi öhdəliyi VergiVergi uçotuna durmayan fiziki şəxsin məsuliyyəti VergiKənd təsərrüfatı məhsulları idxal edən vergi ödəyicisi ƏDV-ni necə əvəzləşdirə bilər? VergiFəaliyyəti olmayan fiziki şəxs VÖEN-ni necə dayandıra bilər? VergiTaksi fəaliyyəti ilə məşğul olan fiziki şəxslərin vergi və sosial ödənişləri