Vergi qanunvericiliyinin təkmilləşdirilməsi istiqamətində növbəti müzakirələr “mks.az” saytının təşkilatçılığı ilə keçirilən "2020-ci ilin Vergi Məcəlləsini birlikdə öyrənək" adlı məlumatlandırma seminarı çərçivəsində aparılıb. Vergilər Nazirliyinin rəsmi şəxsləri və “mks.az” saytının ekspertlərinin iştirakı ilə keçirilən tədbirə 200-dən çox vergi ödəyicisinin nümayəndələri qatılıb.

"mks.az" saytının rəhbəri Qalib Toğrul tədbirin məramı barədə söz açaraq bildirib ki, Vergilər Nazirliyi ictimai iştirakçılığa ən çox önəm verən dövlət qurumlarından biridir. O, Vergi Məcəlləsinə dəyişikliklərin layihəsi hazırlanarkən iqtisadçı ekspertlərin təkliflərinin nəzərə alındığına görə nazirliyə təşəkkürünü bildirib.

Daha sonra "mks.az" saytının əməkdaşı, "Vergi uçotu: A-dan Z-yə" kitabının müəllifi Anar Bayramov "1 yanvar 2020-ci ildən Vergi Məcəlləsində dəyişiklikləri nəzərdə tutan qanun layihəsinin əsas müddəalarının şərhi" mövzusunda geniş təqdimatla çıxış edib. O, qanun layihəsinin əhatə etdiyi dəyişikliklərin əsas istiqamətlərini seminar iştirakçılarının diqqətinə çatdırıb. Vergilər Nazirliyinin bu prosesdə iqtisadçı ekspertlərlə müzakirələrinə də toxunan A.İ.Bayramov bu görüşlərin faydasını xüsusi vurğulayıb.

Vergilər Nazirliyinin nümayəndəsi Elmir Ramazanov "Vergi Məcəlləsinə təklif olunan dəyişikliklərin bəyannamələrdə nəzərə alınması" mövzusunda çıxış edib. Nazirlik rəsmisi öz çıxışında təklif olunan dəyişikliklərin praktiki əhəmiyyəti barədə danışıb.

Vergi məsələləri üzrə ekspert Anar Bayramov isə Vergi Məcəlləsinə təklif olunan dəyişikliklərin müstəqil ekspert qiymətləndirməsini aparıb. Ekspert bu kimi tədbirlərin vacibliyini vurğulayaraq Vergilər Nazirliyinin təmsilçiləri ilə iqtisadçı ekspertlərin görüşlərinin əhəmiyyətini qeyd edib.

Tədbirin sonuncu hissəsində Vergilər Nazirliyinin rəsmiləri Əvəz Quliyev, Rəşad Nuriyev və Elmir Ramazanov, eləcə də "mks.az" saytının ekspertləri vergi ödəyicilərinin nümayəndələrinin suallarını cavablandırıb və təklif xarakterli rəylər dinlənilib.