27 Noyabr 2020

VERGİLƏR

SOSİAL-İQTİSADİ ONLAYN QƏZET

Mərkəzi Bank nağdsız ödənişlərin inkişafı üzrə müsabiqənin nəticələrini açıqlayıb

2019-cu ildə Mərkəzi Bank tərəfindən elan edilən 6 nominasiya üzrə aşağıdakı banklar müsabiqə qalibi olublar:

"POS-terminallarda nağdsız ödənişlər üzrə lider bank" – "Premium Bank" ASC;

"Təmassız ödənişlər üzrə lider bank" – "Expressbank" ASC;

"İnternet bankçılıq xidməti üzrə lider bank" – "Paşa Bank" ASC;

"Mobil bankçılıq xidməti üzrə lider bank" – "Kapital Bank" ASC;

"Təmassız POS-terminal infrastrukturu üzrə lider bank" – "Paşa Bank" ASC;

"Elektron ticarət üzrə ödənişlərin qəbulunda lider bank" – "Unibank KB" ASC.

Mərkəzi Bank qalib bankları təbrik edib və bütün bankları COVİD-19 pandemiyası dövründə zəruriliyi daha da aktuallaşan elektron bankçılığın genişləndirilməsi, müştəri əməliyyatları üzrə kağız daşıyıcıların minimallaşdırılması, təmassız texnologiyaların tətbiqinin artırılması istiqamətində fəaliyyətlərində daha aktiv olmağa çağırıb.

Xatırladaq ki, 2013-cü ildən başlayaraq Mərkəzi Bank Azərbaycan Banklar Assosiasiyası ilə birlikdə rəqəmsal ödənişlərin genişləndirilməsi, innovativ ödəniş həllərinin tətbiqi, elektron bankçılığın inkişafı istiqamətlərində müxtəlif nominasiyalar üzrə illik əsasda müsabiqə təşkil edir və müsabiqə çərçivəsində fərqlənmiş bankların mükafatlandırılması həyata keçirilir.