Qazaxıstan Parlamenti (Məclis) Qazaxıstan, Azərbaycan və Özbəkistan arasında “yaşıl enerji”nin Avropaya ixracı üçün vahid dəhlizin yaradılmasını nəzərdə tutan strateji tərəfdaşlıq sazişini ratifikasiya edib.

Qazaxıstan mətbuatının yaydığı məlumata görə, Bakıda keçirilən COP-29 sammitində rəsmən işə salınan layihə ekoloji cəhətdən təmiz elektrik enerjisinin, hidrogenin və ammonyakın genişmiqyaslı ötürülməsini nəzərdə tutur. Layihənin mərkəzi texnoloji həlqəsi Xəzər dənizinin dibi ilə yüksək gərginlikli sualtı sabit cərəyan kabelinin çəkilməsi olacaq ki, bu da enerjinin oxşar Qara dəniz layihəsi vasitəsilə birbaşa Avropa ölkələrinə ixracına imkan verəcək.

Hazırda layihənin icrası aktiv fazaya keçib. Texniki-iqtisadi əsaslandırmanın (TİƏ) hazırlanması layihənin yekun texniki parametrlərini və maliyyə modelini müəyyən edəcək İtaliyanın “CESI” konsaltinq şirkətinə həvalə olunub. TİƏ-nin hazırlanması Asiya İnkişaf Bankı və Asiya İnfrastruktur İnvestisiya Bankının ayırdığı 2 milyon dollar qrant hesabına maliyyələşdirilir. Əməliyyat idarəetməsi və işlərin koordinasiyası üçün üç ölkənin sistem operatorları tranzit infrastrukturunun formalaşdırılması üzrə fəaliyyətlərini müntəzəm olaraq sinxronlaşdıran “Green Corridor Alliance” birgə müəssisəsini yaradıblar.