Azərbaycan Dövlət Turizm Agentliyinin nümayəndələri Berlində 20 ölkənin müvafiq dövlət qurumlarının rəhbərlərini bir araya gətirən BMT Turizm Nazirlər Sammitində iştirak ediblər.

Sammit çərçivəsində Özbəkistanın Turizm Komitəsinin rəhbərliyi ilə ikitərəfli görüş keçirilib. Tərəflər hədəf bazarlarda təşviqat strategiyalarına dair fikir mübadiləsi aparıb və 2025-ci ilin aprel ayında iki ölkənin milli turizm strukturları arasında imzalanmış Əməkdaşlıq Memorandumu müddəalarının icra vəziyyətini təhlil ediblər. Danışıqların yekunu olaraq tərəfdaşlığın möhkəmləndirilməsi məqsədilə əlavə alətlərin tətbiqinə dair razılıq əldə olunub.

Səfər proqramına, həmçinin Azərbaycanın Almaniyadakı səfirliyində alman turizm sənayesinin nümayəndələri ilə görüş də daxil edilib. İştirakçılara Azərbaycanın turizm potensialı və ölkədə keçiriləcək irimiqyaslı beynəlxalq tədbirlərin qrafiki barədə ətraflı məlumat verilib. Tədbir sahə peşəkarları üçün sual-cavab sessiyası ilə yekunlaşıb.