Azərbaycana səfər edən BƏƏ-nin iqlim dəyişikliyi və ətraf mühit naziri Əmna Əl Dahak Əl Şəmsinin rəhbərlik etdiyi nümayəndə heyəti ilə Azərbaycan Respublikasının İxracın və İnvestisiyaların Təşviqi Agentliyində (AZPROMO) görüş keçirilib.

Agentliyin məlumatına görə, görüşdə AZPROMO-nun icraçı direktoru Yusif Abdullayev Azərbaycanın əlverişli biznes və investisiya mühiti, işğaldan azad edilən ərazilər və iqtisadi zonalarda sərmayədarlar üçün yaradılan imkanlar, nəqliyyat-logistika potensialı barədə məlumat verib. AZPROMO-nun fəaliyyəti, ixracın və investisiyaların təşviqi mexanizmlərindən bəhs edib. Bu xüsusda Azərbaycan şirkətlərinin AZPROMO-nun təşkilatçılığı ilə BƏƏ-də keçirilən “Gulfood” sərgisində mütəmadi iştirakı qeyd edilib.

BƏƏ-nin iqlim dəyişikliyi və ətraf mühit naziri Əmna Əl Dahak Əl Şəmsi nümayəndə heyətinin ölkəmizə səfərinin məqsədinin Azərbaycandan idxal imkanlarını daha yaxından öyrənmək, xüsusilə aqrar sahədə investisiya perspektivlərini dəyərləndirmək olduğunu bildirib, əməkdaşlıq istiqamətləri haqqında fikirlərini bölüşüb.

Görüş zamanı işbirliyi perspektivlərinə dair müzakirə aparılıb. Tərəflər bir-birini ölkələrimizdə təşkili planlaşdırılan beynəlxalq tədbirlərdə, o cümlədən “Investopia 2026” (BƏƏ) və Ümumdünya Şəhərsalma Forumunun 13-cü sessiyasında (Azərbaycan) iştiraka dəvət ediblər.