2025-ci il ərzində “Azəri-Çıraq-Günəşli” (AÇG) yatağı üzrə fəaliyyətə təqribən 564 milyon dollar əməliyyat məsrəfləri və 1,288 milyard dollar əsaslı məsrəflər xərclənib.

bp-dən verilən məlumata görə, ötən il AÇG-dən ümumi hasilat – “Çıraq” (21 000), “Mərkəzi Azəri” (90 000), “Qərbi Azəri” (76 000), “Şərqi Azəri” (43 000), “Dərinsulu Günəşli” (51 000), “Qərbi Çıraq” (24 000) və ACE (25 000) platformalarından birlikdə – gündə orta hesabla 330 000 barel və ya ümumilikdə təxminən 120 milyon barel, yəni 16 milyon ton olub.

2025-ci ilin sonunda AÇG-də ümumilikdə 147 neft hasilat quyusu, 49 su injektor quyusu və 10 qaz injektor quyusu istismarda olub. İl ərzində AÇG-də 10 neft hasilatı quyusu, 5 su injektoru, 1 qaz injektoru və şlamların yenidən laya vurulması üçün 1 quyu qazılıb tamamlanıb.

Hesabat ilində AÇG-dən Azərbaycan dövlətinə əsasən Səngəçal terminalından, həmçinin “Neft Daşları”ndakı qurğu vasitəsilə gündə orta hesabla 8 milyon kubmetr, ümumilikdə isə 2,7 milyard kubmetr səmt qazı təhvil verilib. Hasil edilən səmt qazının qalan hissəsi təzyiqi saxlamaq məqsədilə yenidən kollektora vurulub.