“AzerGold” sikkə və külçələrin gerialışı üzrə müştərilərə 1 milyon manatdan çox ödəniş edib
2025-ci ilin yanvar-may aylarında “AzerGold” QSC tərəfindən ümumi çəkisi 85 unsiya olan qızıl sikkə və külçələrin gerialışı həyata keçirilib.
QSC-nin məlumatına görə, bu, ötən ilin müvafiq dövrü ilə müqayisədə 244 faiz artım deməkdir. Gerialış əməliyyatları nəticəsində müştərilərə 459 min manat ödəniş edilib ki, bu da ötən ilin eyni dövrü ilə müqayisədə 376 faiz çoxdur.
Bütün fəaliyyət dövrü ərzində isə ümumi çəkisi 274,4 unsiya olan qiymətli məhsulların gerialışı həyata keçirilib, ödənişlərin ümumi məbləği 1,15 milyon manat təşkil edib. Ötən dövr ərzində geri alınmış məhsulların 260,8 unsiya həcminin təkrar satışı həyata keçirilib və 1,23 milyon manat gəlir əldə edilib.
