Azərbaycanda dövlət dəstəyi ilə təqdim olunan aqrar sığorta mexanizmi çərçivəsində pambıq sahələrinin sığortalanması prosesinə start verilib.

Kənd Təsərrüfatı Nazirliyinin məlumatına görə, pambıq əkinlərinə ən çox zərər vuran hallar dolu, sel-subasma və leysan hadisələridir. Dövlət dəstəkli aqrar sığorta mexanizmi bütün bu halların vurduğu zərəri qarşılayır.

Pambıq ölkənin 20-yə yaxın rayonunda becərilən əsas texniki bitkilərdən sayılır. Hazırda Azərbaycanda 110 min hektara yaxın ərazidə pambıq becərilir. Pambıq sahələrinin böyük hissəsi Mil-Muğan, Salyan-Şirvan və Mərkəzi Aran iqtisadi zonalarının payına düşür.

2023-cü ildə ölkədə 14 min hektar pambıq sahəsi sığorta edildiyi halda, 2024-cü ildə sığortalanan pambıq əkinlərinin sahəsi 2 dəfə artaraq 29 min hektara yaxınlaşıb.

Sığortalanan pambıq sahələrinin sahəsi ilə yanaşı, pambıq becərən fermerlərə dəyən zərərə görə sığorta ödənişlərinin həcmi də artır. Belə ki, 2023-cü ildə 686 hektar sahəyə dəyən zərərlər üzrə fermerlərə 386 min manat sığorta ödənişi edildiyi halda, 2024-cü ildə təqribən 4 min hektar əraziyə dəyən zərərlər üzrə fermer və təsərrüfatlara ümumilikdə 880 min manatdan artıq sığorta ödənişi edilib.

Təklif olunan sığorta zərfləri, təminat verilən risklər barədə ətraflı məlumatla Fondun rəsmi səhifəsindən (asf.gov.az) tanış olmaq olar.