2025-ci ilin yanvar-mart ayları ərzində İqtisadiyyat Nazirliyi yanında Əmlak Məsələləri Dövlət Xidməti tərəfindən 11 hərrac keçirilib. Hərraclarda 4 səhmdar cəmiyyətinin səhm paketi, 1 kiçik dövlət müəssisəsi, 223 nəqliyyat vasitəsi özəlləşdirilib.

Dövlət Xidmətinin məlumatına görə, hesabat dövründə hərraca çıxarılan dövlət əmlakı üzrə 71 elektron sifariş qəbul edilib, hərraclarda iştirak etmək məqsədilə “Elektron hərrac” proqram təminatı vasitəsilə 12 onlayn qoşulma reallaşıb.

Bu ilin ilk rübündə özəlləşdirmədən dövlət büdcəsinə daxilolmalar 40,3 milyon manat təşkil edib ki, bu da ötən ilin eyni dövrü ilə müqayisədə 87,9 faiz çoxdur.

Rüb ərzində 137-si qeyri-yaşayış, 847-si isə torpaq sahələri üzrə olmaqla 984 yeni icarə müqaviləsi bağlanılıb. Daşınmaz dövlət əmlakının (qeyri-yaşayış və torpaq sahələrinin) icarəsindən dövlət büdcəsinə 10,4 milyon manat vəsaitin ödənilməsi təmin olunub, ötən ilin eyni dövrü ilə müqayisədə 13 faiz artım qeydə alınıb.

Beləliklə, 2025-ci ilin yanvar-mart ayları ərzində dövlət əmlakının özəlləşdirilmə və icarəsindən büdcəyə ümumilikdə 50,7 milyon manat vəsait daxil olub. Bu ötən ilin eyni dövrü ilə müqayisədə 65,2 faiz çoxdur.