Ötən həftə ölkə ərazisində hava şəraitinin kəskin pisləşməsi nəticəsində meyvə bağlarına və əkin sahələrinə dəyən ziyana görə Aqrar Sığorta Fondu tərəfindən fermerlərə sığorta ödənişləri həyata keçiriləcək.

Kənd Təsərrüfatı Nazirliyinin məlumatına görə, 14–20 aprel tarixlərində Fonda ümumilikdə 15 rayon üzrə 76 müraciət daxil olub. Müraciət edən fermerlər əsasən Xaçmaz, Bərdə, Ağsu, Quba, Şamaxı, Şabran, Qusar, Ağdaş, Neftçala və digər rayonların sakinləridir. Daxil olan müraciətlərin 36-sı sel-subasma, 40-ı isə fırtına və qasırğanın təsərrüfatlara vurduğu zərərlə bağlıdır.

Hazırda ekspertlər hadisə baş verən ərazilərə baxış keçirir, baş vermiş hadisələri və onların nəticələrini qeydə alır, ilkin qiymətləndirmə aparırlar. Araşdırmalar yekunlaşdıqdan sonra qanunvericiliyə uyğun olaraq sığorta ödənişləri həyata keçiriləcək.