BCI (Better Cotton Initiative) standartlarının tətbiqi Azərbaycanın pambıq məhsullarının ixracını artırmasına kömək edəcək. Bu barədə "Azərbaycan iqtisadiyyatı" Teleqram kanalına "Prime Cotton" şirkətinin baş icraçı direktoru Rövşən Mahmudov məlumat verib.

Onun sözlərinə görə, ölkədə bu standartın tətbiqi üzrə işlər yaxın bir ay ərzində tamamlanacaq. “Son 1,5 il ərzində bu istiqamətdə olduqca mürəkkəb və çətin bir yol qət edilib, müntəzəm olaraq inspeksiyalar aparılıb, tarlalara baxış keçirilib, istifadə olunan pestisidlərin tərkibi yoxlanılıb və s. Dünya bazarına keyfiyyətli məhsul çıxarmaq üçün standartların olması zəruridir ki, onlardan biri də BCI-dır. Ölkə üzrə bu standartın tətbiqi bizə imkan yaradacaq ki, müvafiq sertifikatları əldə edək. Bu, ilk növbədə inteqrəolunmuş idarəetmə sisteminin şəffaflığının təmin edilməsinə imkan yaradacaq”, - Rövşən Mahmudov qeyd edib.