2023-cü ilin sonu ilə müqayisədə investisiya şirkətlərinin aktivləri 89 faiz (107 milyon manat) artaraq 228 milyon manat, öhdəlikləri isə 1,4 dəfə (105 milyon manat) artaraq 180 milyon manata çatıb.

Azərbaycan Mərkəzi Bankının Maliyyə Sabitliyi Hesabatına əsasən, investisiya şirkətlərinin aktiv və öhdəliklərindəki artımı şərtləndirən əsas amil repo/əks-repo əməliyyatlarının həcminin artımı ilə bağlı olub. Belə ki, 2023-cü ilin müvafiq dövrü ilə müqayisədə 2024-cü ildə repo bazarındakı əməliyyatlar iki dəfədən çox artıb.

Dövr ərzində investisiya şirkətlərinin müştəri aktivləri genişlənib. 2023-cü ilin sonu ilə müqayisədə investisiya şirkətlərinin müştəri aktivləri 8 faiz (121 milyon manat) artaraq 1,721 milyard manata çatıb. Müştəri aktivlərində artımın əsas səbəbi xarici bazarda broker xidmətləri olub. Belə ki, xarici bazarda broker xidmətləri üzrə müştəri aktivləri 6,4 faiz (83 milyon manat) artıb.

2024-cü ilin ilk yarımilinin sonuna olan məlumatlara əsasən, sektor üzrə məcmu kapital 46 milyon manat, tələb olunan kapital isə 5,2 milyon manat təşkil edib ki, bu da investisiya şirkətlərinin kifayət qədər kapital buferinə sahib olmasını şərtləndirir.