Gələn il Azərbaycanda daha yüksək temperaturlarda yanmayan silikon kabellərin istehsalına başlanılacaq.

Bunu “Azərbaycan iqtisadiyyatı” Teleqram kanalına ölkəmizin qabaqcıl kabel istehsalçılarından olan “Çıraq inşaat” MMC-nin istehsal rəhbəri Həsən Həsənov deyib.

Onun sözlərinə görə, yanmaz kabellər adi halda 70-100 dərəcəyə qədər temperatura tab gətirir. Amma yeni kabellər 300-500 dərəcə temperatura davamlı olacaq: “İstehsala başlamaq üçün bəzi avadanlıqları ölkəyə gətirməliyik. Yeni ildən istehsala başlamağı planlaşdırırıq. İstehsal Bakıda həyata keçiriləcək”.

H.Həsənov əlavə edib ki, hazırda dünya standartlarına uyğun geniş çeşiddə, müxtəlif ölçüdə və gərginlikdə elektrik kabelləri, naqillər istehsal edən şirkət xammalı Rusiya, Türkiyə və Avropa ölkələrindən alır. “Çıraq inşaat”ın məhsulları daxili bazarda satılmaqla yanaşı, xaricə, əsasən də Gürcüstana ixrac edilir.