Bu ilin yanvar-iyun ayları ərzində Naxçıvan Muxtar Respublikasında sahibkarlara 46 lisenziya verilib, büdcəyə 19,6 min manat vəsait ödənilib. Bu barədə muxtar respublikanın İqtisadiyyat Nazirliyinin 2024-cü ilin 6 ayında fəaliyyətinin nəticələrinə dair hesabatda bildirilir.

Hesabat dövründə müvafiq qurumlar tərəfindən verilən 1447 icazə reyestrdə qeydiyyata alınıb. Qeydiyyata alınan icazələr ötən ilin müvafiq dövrü ili müqayisədə 8,4 dəfə, verilən icazələrdən büdcəyə daxilolmalar isə 2 dəfə artıb.

Cari ilin yanvar-iyun aylarında sahibkarlara 166 mənşə sertifikatı verilib ki, bu da ötən ilin müvafiq dövrü ilə müqayisədə 17,7 faiz çoxdur. Verilən mənşə sertifikatlarından büdcəyə daxilolmalar da ötən ilin eyni dövrü ilə müqayisədə 17,7 faiz artıb. Cari ilin ilk altı ayında “Sertifikatlaşdırma və Metrologiya Mərkəzi” PHŞ tərəfindən 1971 ədəd ölçmə vasitəsi yoxlanılıb ki, bu da 2023-cü ilin eyni dövrü ilə müqayisədə 13,7 faiz çoxdur.

Bu dövrdə Sahibkarlığın İnkişafı Fondunun vəsaiti hesabına maliyyələşdirilən kreditlər sənaye və aqrar sektoru əhatə edib. Vaxtı keçmiş kredit borclarının geri qaytarılması təmin edilib və hesabat dövründə 10,1 milyon manat geri qaytarılıb. Nəticədə Fondun hesab qalığı 2,4 dəfə artaraq 16,1 milyon manat təşkil edib.