“Azərbaycanla Özbəkistan arasında dinamik inkişaf edən münasibətlərimiz dövlət başçılarının dostluq, qardaşlıq və qarşılıqlı etimad amilinə, eləcə də xalqlarımızın tarixi, mədəni və qohumluq birliyinə əsaslanır”.

Bunu “Özbəkistan 24” telekanalına müsahibəsində Azərbaycanın iqtisadiyyat naziri Mikayıl Cabbarov deyib.

Nazir xatırladıb ki, səfər zamanı Azərbaycan nümayəndə heyəti Özbəkistan Prezidenti Şavkat Mirziyoyev tərəfindən qəbul edilib: “Özbəkistan dövlətinin başçısının diqqətinə çatdırıldı ki, Azərbaycan və Özbəkistan prezidentlərinin tapşırıqlarının icrası çərçivəsində bu gün əlaqələrimiz əməkdaşlığın dörd əsas istiqamətinə əsaslanır: nəqliyyat, qarşılıqlı investisiyalar, enerji və sənaye kooperasiyası”.

Mikayıl Cabbarov vurğulayıb ki, bu sahələrin hər birində yüksək dinamika müşahidə olunur. 2024-cü ilin birinci rübünün yekunlarına əsasən, Özbəkistandan Azərbaycan ərazisindən keçməklə 1 milyon ton həcmində yükün daşınmasına nail olmaq məqsədi artıqlaması ilə həyata keçirilir.

Özbəkistan Prezidenti ilə müzakirə olunan məsələlərin təfərrüatlarına toxunan iqtisadiyyat naziri qeyd edib ki, görüşdə enerji sahəsində əməkdaşlıq məsələləri, Azərbaycan, Özbəkistan və Qazaxıstanın iqtisadiyyat və energetika nazirlərinin üçtərəfli görüşü, avtomobil, toxuculuq, pambıqçılıq, ipəkçilik və sənayenin digər sahələri müzakirə edilib.

Nazir Azərbaycan-Özbəkistan İnvestisiya Şirkətinin fəaliyyətinə də toxunub: “Ötən gün investisiya şirkətinin Müşahidə Şurasının iclası baş tutub. Artıq dəyəri 250 milyon dollardan çox olan portfel layihəsi formalaşdırılıb”.