2023-cü il ərzində Azərbaycanın Türkmənistanla ticarət dövriyyəsinin ümumi həcmi 2022-ci ilə nisbətdə 44,5 faiz və ya 238,5 milyon ABŞ dolları artaraq 773,9 milyon dolları üstələyib.

“Azərbaycan iqtisadiyyatı” Teleqram kanalının Dövlət Gömrük Komitəsinin hesabatı əsasında apardığı hesablamalara görə, ötən il Azərbaycandan Türkmənistana 86,1 milyon dollar dəyərində məhsul ixrac edilib ki, bu da 2022-ci ilin göstəricisindən 3,3 dəfə və ya 60,4 milyon dollar çoxdur.

Türkmənistandan Azərbaycana idxal edilən məhsulların dəyəri isə 34,9 faiz və ya 178 milyon dollar artaraq 687,79 milyon dollar təşkil edib.

2023-cü ilin nəticələrinə görə, ölkənin ümumi ticarət dövriyyəsində Türkmənistanla ticarətin payı 1,51 faiz təşkil edib ki, bu da bir il öncəki eyni göstəricini 0,5 faiz bəndi üstələyir.