Ötən il fermer təsərrüfatlarına rekord məbləğdə aqrar sığorta ödənişi edilib

2023-cü il ərzində müxtəlif hadisələrdən zərər görən sığortalı fermer və təsərrüfatlara Aqrar Sığorta Fondu tərəfindən 4,4 milyon manat sığorta ödənişləri edilib ki, bu da 2022-ci illə müqayisədə 2 milyon manat çoxdur. 2022-ci ildə aqrar sığorta hadisələri üzrə sığortalı fermerlərə 2,4 milyon manat ödəniş edilmişdi.

Kənd Təsərrüfatı Nazirliyindən verilən məlumata görə, ötən il bitkiçilik sahəsində baş verən zərərlər üzrə 3,463 milyon manat ödəniş edilib. Bu, 2022-ci illə müqayisədə 1,7 milyon manat və ya 2 dəfə artıqdır.

Heyvandarlıq sığortası üzrə baş verən hadisələrə görə sığortalı fermer və təsərrüfatlara 910 066 manat sığorta ödənişi edilib, bu da öncəki ilin göstəricisini 200 min manat və ya 28 faiz üstələyib.

Ən böyük məbləğdə sığorta ödənişləri buğda, arpa, pambıq, qarğıdalı və gilas bitkiləri üzrə verilib.