Bakı Fond Birjasında “AzerGold” QSC-nin istiqrazlarının mütəşəkkil kapital bazarlarına daxil olması münasibətilə “Açılış zəngi” mərasimi keçirilib.

QSC-dən verilən məlumata görə, mərasimdə qeyd olunub ki, “AzerGold” QSC-nin nominal dəyəri 100 ABŞ dolları, tədavül müddəti 3 il, ümumi dəyəri 20 milyon ABŞ dolları olan istiqrazları illik 6% kupon dərəcəsi ilə emissiya edilməklə ölkəmizin qiymətli kağızlar bazarının inkişafına, vətəndaşlara mənfəətli və etibarlı investisiya imkanı yaratmağa xidmət edir.

Bildirilib ki, “AzerGold” tərəfindən istiqrazlar ilk dəfə 2020-ci ildə Bakı Fond Birjasında hərrac üsulu ilə kütləvi ticarətə buraxılıb. “PAŞA Kapital İnvestisiya Şirkəti” QSC-nin anderrayter qismində çıxış etdiyi “AzerGold” istiqrazları 3 illik tədavül müddəti ərzində investorlara 2,4 milyon dollar məbləğində faiz gəlirləri qazandırıb.

Əlavə edilib ki, yeni istiqrazların tədavülü də kapital bazarında maliyyə alətlərinin şaxələndirilməsinə və investorlar üçün münbit sərmayə mühitinin formalaşdırılmasına mühüm töhfələr verəcək.