Hazırda "Bakı Mərmər Qranit” MMC-də müəssisənin özəlləşdirmə öncəsi sağlamlaşdırılması və potensial investorlar üçün cəlbediciliyinin artırılması istiqamətində tədbirlər həyata keçirilir.

"Azərbaycan iqtisadiyyatı" Teleqram kanalı xəbər verir ki, bunu "Bakı Mərmər Qranit” MMC-nin icraçı direktoru Müşfiq İbadov deyib.

Onun sözlərinə görə, müəssisə Azərbaycan Respublikası Prezidentinin 29 oktyabr 2021-ci il və 30 dekabr 2022-ci il tarixli sərəncamları ilə özəlləşməyə açılıb. Artıq özəlləşdirmə komissiyası yaradılıb, inventarlaşdırma aparılıb, müstəqil qiymətləndirici şirkətin iştirakı ilə nizamnamə kapitalı müəyyən olunub, yeni hüquqi şəxs - “Bakı Mərmər Qranit” MMC təsis edilib. Müəssisənin nizamnamə kapitalı 17 059 000 manat olmaqla, hər biri 100 manat olan 170 590 paydan ibarətdir. Müəssisə 6,18 ha ərazidə yerləşir. Əsas istehsal sahələri mərmər və qranitin kəsilməsi, cilalanması və digər emal proseslərini həyata keçirən mərmər, qranit, penobeton, aqlay daş və daha bir neçə sexdən ibarətdir.

Layihə üzrə illik istehsal gücü 300 000 kvadratmetr təşkil edir. Müəssisədə əsasən Türkiyədən alınmış avandanlıqlar quraşdırılıb. Eyni zamanda, müəssisədə Çin, İtaliya, Almaniya və Rusiya istehsalı olan dəzgahlar da mövcuddur. M.İbadov bildirib ki, zavod gələcəkdə istehsal edəcəyi məhsulları xaricə də ixrac etməyi planlaşdırır.