İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin tabeliyində olan Azərbaycan Standartlaşdırma İnstitutunda (AZSTAND) Qazaxıstan Standartlaşdırma və Metrologiya İnstitutunun (KazStandard) nümayəndə heyəti ilə görüş keçirilib.

İnstitutdan verilən məlumata görə, görüşdə qurumlar arasında mövcud əlaqələr, əməkdaşlıq perspektivləri nəzərdən keçirilib, qarşılıqlı təcrübə mübadiləsinin vacibliyi vurğulanıb.

Bundan əlavə, tərəflər Qazaxıstan Standartlaşdırma və Metrologiya İnstitutunun Beynəlxalq Elektrotexniki Komissiyada (IEC) fəaliyyəti, texniki reqlamentlər və onların istinad standartlarının hazırlanması, qəbulu və tətbiqi, uyğunluğunun qiymətləndirilməsi, beynəlxalq standartların qəbulolunma prosedurlarına dair müzakirələr aparıblar.