Şuşada Azərbaycan Hesablama Palatası və Pakistan İslam Respublikası Baş Auditor Ofisi arasındakı Anlaşma Memorandumunun yenilənərək imzalanması mərasimi keçirilib.

Hesablama Palatasından “vergiler.az”a verilən məlumata görə, sənədi Palatanın sədri Vüqar Gülməmmədov və Pakistan İslam Respublikasının Baş Auditoru Muhammad Acmal Qondal imzalayıblar.
Sənəd özündə mövcud qarşılıqlı əlaqələrin daha da möhkəmləndirilməsi, eyni zamanda kənar dövlət maliyyə nəzarəti sahəsində potensialın artırılması istiqamətində birgə fəaliyyətlərin daha məhsuldar təşkilini ehtiva edir.

İmzalanma mərasimindən sonra Pakistan Baş Auditor Ofisinin nümayəndəsi Hesablama Palatasının maliyyə hesabatlarının auditinin nəticələri barədə təqdimatla çıxış edib.

Daha sonra Hesablama Palatasının sədri ilə Pakistan İslam Respublikası Baş Auditoru arasında əməkdaşlıq əlaqələrinin gələcək perspektivləri, eləcə də potensialın gücləndirilməsi barədə fikir mübadiləsi aparılıb.