Bu ilin yanvar-may aylarında Azərbaycanın Avropa İttifaqı (Aİ) ölkələri ilə ticarət dövriyyəsinin ümumi həcmi 1,68 milyard ABŞ dolları və ya 16,2 faiz artaraq 12,1 milyard dollar təşkil edib.

"vergiler.az"ın Dövlət Gömrük Komitəsinin hesabatı əsasında apardığı hesablamalara görə, cari ilin ilk beş ayında Azərbaycandan Aİ ölkələrinə 10,7 milyard dollar dəyərində məhsul ixrac edilib ki, bu da 2022-ci ilin eyni göstəricisindən 1,16 milyard dollar və ya 12,1 faiz çoxdur.

Aİ ölkələrindən Azərbaycana idxal edilən məhsulların dəyəri isə 66,1 faiz və ya 527,2 milyon dollar artaraq 1,32 milyard dolları üstələyib.

Cari ilin ilk beş ayının nəticələrinə görə, ölkənin ümumi ticarət dövriyyəsində Aİ ölkələri ilə ticarətin payı 52,7 faiz təşkil edib ki, bu da bir il əvvəlki eyni göstəricidən 2 faiz bəndi çoxdur.