“Nazirlər Kabinetinin “Malların daxildə emal xüsusi gömrük proseduru altında yerləşdirilməsi Qaydaları”na 2023-cü il 10 aprel tarixində etdiyi dəyişiklik sənayenin bütün sahələrinə təsir edəcək, ancaq bundan daha çox tekstil, qablaşdırma sənayesinin təmsilçiləri, xüsusilə də uniformaların tikilməsi və ixracı ilə məşğul olan şirkətlər faydalanacaqlar”.

Bunu “Azərbaycan iqtisadiyyatı” Teleqram kanalına Azərbaycan Respublikasının İxracın və İnvestisiyaların Təşviqi Agentliyi – AZPROMO-nun icraçı direktorunun müşaviri Tural Hacılı deyib.

Onun sözlərinə görə, bu dəyişiklik edilənə qədər emalla məşğul olan istehsalçılar xammal və yarımfabrikatları idxal etdikləri zaman müəyyən vergi və rüsum ödədiklərindən qiymət baxımından digər ölkələrin istehsalçılarına nisbətən daha az rəqabətqabiliyyətli olurdular. Daxildə emal xüsusi gömrük proseduru ilə bağlı son dəyişiklikdən sonra isə istehsalçılar daha rəqabətqabiliyyətli məhsul təklif edə biləcəklər: “Bu da, sözsüz ki, ölkə daxilində istehsalın genişlənməsinə səbəb olacaq və ixrac səbətində daha yüksək dəyərli məhsulların çəkisinin artmasına gətirib çıxaracaq”.

İlhamə İSABALAYEVA