Azərbaycan-Avstriya biznes forumu keçirilib

Avstriya nümayəndə heyətinin Azərbaycana indiyədək təşkil edilən ən geniş ticarət missiyası çərçivəsində Avstriya Federal İqtisadi Palatasının ticarətin təşviqi təşkilatının – “Advantage Austria”nın təşəbbüsü ilə Azərbaycan-Avstriya biznes forumu keçirilib.

İxracın və İnvestisiyaların Təşviqi Agentliyindən (AZPROMO) “vergiler.az”a verilən məlumata görə, Agentliyin təmsil olunduğu Forumda Avstriyanın ticarət, logistika, İKT, sənaye, tikinti və su təsərrüfatı sektorlarını təmsil edən aparıcı şirkət nümayəndələri iştirak edib. Azərbaycan və Avstriyanın biznes subyektləri arasında əlaqələrin dərinləşdirilməsinə dair müzakirələr aparılıb.

Tədbirdə Azərbaycan və Avstriya arasında iqtisadi əlaqələrin və biznes tərəfdaşlığının inkişaf etdiyi vurğulanıb, ticarət və investisiya sahələrində əməkdaşlığın müsbət dinamikası qeyd edilib. Bildirilib ki, mühəndislik, konsaltinq və layihələrin idarə olunması sahələrində ixtisaslaşmış çoxsaylı Avstriya şirkətləri artıq Azərbaycanda fəaliyyət göstərir və onların artım potensialı yüksək qiymətləndirilib. Yeni əməkdaşlıq sahələri ilə bağlı fikir mübadiləsi aparılıb.

Forumda AZPROMO tərəfindən Avstriya şirkətlərinə Azərbaycanın investisiya mühiti, biznes imkanları və sərmayədarlara təqdim olunan imtiyazlara dair təqdimat nümayiş olunub, xarici sahibkarların sualları cavablandırılıb. Tədbir B2B görüşlərlə davam edib.