Fevral ayından başlayaraq Azərbaycanda illik inflyasiya tempi azalıb. “vergiler.az” xəbər verir ki, bunu Azərbaycan Mərkəzi Bankı bəyan edib. Bildirilib ki, mart ayında illik inflyasiya 13,6% təşkil edib. Bu da ötən ilin sentyabr ayında qeydə alınan pik səviyyə ilə müqayisədə 2 faiz bəndi aşağıdır.

“Qlobal iqtisadi aktivliyin azalmasının, əksər ölkələrdə pul siyasətinin sərtləşdirilməsinin və dünya əmtəə qiymətlərində aşağı düşmə meylinin təsiri ilə əsas ticarət tərəfdaşlarında faktiki inflyasiya nisbətən səngiyib. Dünya Bankının əmtəə bazarları haqqında aprel hesabatına əsasən martda aylıq əsasda enerji qiymətləri 6,3%, qeyri-enerji qiymətləri 2,2% azalıb. BMT-nin Ərzaq və Kənd Təsərrüfatı Təşkilatının (FAO) məlumatına görə, dünya ərzaq qiymətləri indeksi 2023-cü ilin martında aylıq 2,1% azalıb. Tədiyə balansının cari əməliyyatlar hesabının profisitli olması qiymət sabitliyinin əsas lövbəri olan məzənnə sabitliyini dəstəkləyir” – deyə Mərkəzi Bankdan bildirilib.

Əsas ixrac əmtəələri üzrə dünya qiymətlərinin əlverişli qalması və qeyri neft-qaz ixracının artımı ilin sonuna cari əməliyyatlar balansının profisitli olacağını deməyə imkan verir.

“Bu özünü valyuta bazarında da göstərir. Belə ki, 2023-cü ilin 4 ayında valyuta hərraclarının 97%-də təklif tələbi üstələyib. Manatın nominal effektiv məzənnəsinin möhkəmlənməkdə davam etməsi inflyasiyanın xarici amillərinə azaldıcı təsir edir. Manatın nominal effektiv məzənnəsi 2022-ci ildə 8,4%, 2023-cü ilin 4 ayında 4,8% möhkəmlənib. Bununla bərabər, monetar şəraitə dair qəbul edilmiş qərarlar da inflyasiyanın tələb amillərini məhdudlaşdırır”.