17-19 may tarixlərində Bakı Ekspo Mərkəzində sayca 16-cı olan beynəlxalq kənd təsərrüfatı “Caspian Agro” və 28-ci beynəlxalq qida sənayesi “InterFood Azerbaijan” sərgiləri keçiriləcək.

“Caspian Event Organisers”dən “vergiler.az”a verilən məlumata görə, sərgilərdə rekord sayda milli və regional stendlər nümayiş olunacaq.

“Caspian Agro” yenidən kənd təsərrüfatı sənayesinin aparıcı iştirakçılarını, yerli və xarici ekspertləri, o cümlədən idxalçılar, ixracatçılar, kənd təsərrüfatı məhsullarının distribyutorları, topdan və pərakəndə ticarət nümayəndələri, həmçinin fermerlər də daxil olmaqla minlərlə peşəkar ziyarətçi auditoriyasını bir yerə toplayacaq.

Sərgidə iştirakçılar arasında 18 ölkənin şirkətləri yer alacaq. Üç gün davam edəcək sərgidə kənd təsərrüfatı sahəsində innovativ texnologiyalar müzakirə olunacaq. Builki sərginin əsas istiqamətlərindən birini “yaşıl kənd təsərrüfatı” təşkil edir.

“Caspian Agro” ilə paralel olaraq, Xəzər regionunda qida sənayesi nümayəndələrinin əsas görüş yeri olan 28-ci Azərbaycan Beynəlxalq Qida Sənayesi Sərgisi “InterFood Azerbaijan” təşkil ediləcək. Sərgidə Azərbaycanla yanaşı 15 ölkənin şirkətləri təmsil olunacaq.

Ənənəvi olaraq, sərgilər çərçivəsində ikitərəfli işgüzar görüşlər (B2B) keçiriləcək. Burada yerli və xarici şirkətlərin nümayəndələri üzbəüz formatda əməkdaşlıq və gələcək tərəfdaşlıq yollarını müzakirə edə biləcəklər. Bundan əlavə, ikitərəfli işgüzar görüşlər çərçivəsində özəl şirkətlərin nümayəndələri dövlət qurumlarının təmsilçiləri ilə görüş imkanı əldə edəcəklər.