Ər-Riyad şəhərində Səudiyyə Ərəbistanı-Azərbaycan Birgə İşgüzar Şurasının ilk iclası keçirilib.

Kiçik və Orta Biznesin İnkişafı Agentliyindən (KOBİA) “vergiler.az”a verilən məlumata görə, iclasda hər iki ölkədən rəsmi şəxslər və iş adamları iştirak ediblər.

Tədbir çərçivəsində KOBİA və AZPROMO tərəfindən ölkənin biznes və investisiya imkanları, ixrac potensialı, yerli və xarici iş adamlarına göstərilən dəstək və xidmətlər, eləcə də Azərbaycan iş adamları tərəfindən biznes və ticarət sahəsində əməkdaşlıq perspektivləri barədə təqdimatlar keçirilib.

Səudiyyə Ərəbistanının İnvestisiya Nazirliyi və İxracın İnkişafı İdarəsi tərəfindən isə bu ölkənin investisiya potensialına, iş adamları üçün yaradılan imkanlara və istehsal olunan məhsul və xidmətlərə dair təqdimatlar keçirilib.

Tədbirdən sonra təşkil olunan “B2B” görüşlərdə hər iki ölkənin KOB-ları arasında məlumat və təcrübə mübadiləsi, əməkdaşlıq imkanları, birgə tədbirlərin və görüşlərin, qarşılıqlı biznes missiyaların təşkili kimi məsələlər müzakirə edilib.