KOB subyektlərinin biznes biliklərinin artırılması və sahibkarlığa dair məlumatlılıq səviyyəsinin yüksəldilməsi məqsədilə cari ilin yanvar-mart ayları ərzində Kiçik və Orta Biznesin İnkişafı Agentliyi (KOBİA) tərəfindən 69 təlim təşkil olunub.

KOBİA-dan “vergiler.az”a verilən məlumata görə, təlimlərdən 825 KOB subyekti və biznesə başlamaq istəyən şəxs yararlanıb.

Təlimlər KOB-ların təlim ehtiyaclarına uyğun olaraq, əsasən, satış, marketinq, mühasibatlıq, işçi heyətinin idarə edilməsi, brendləşmə, biznesdə innovasiyaların tətbiqi, biznes planın hazırlanması, layihələrin idarə olunması və digər mövzuları əhatə edir.

Bu dövrdə 243 sahibkarlıq subyektinə biznesin qurulması və inkişaf etdirilməsi üzrə məsləhət xidməti göstərilib.

Agentlik tərəfindən həmçinin 47 biznes planın hazırlanması üçün müvafiq dəstək təmin edilib.

KOBİA tərəfindən göstərilən təlim və məsləhət xidmətləri ödənişsizdir.