Bu il Bakıda keçirilməsi nəzərdə tutulan Azərbaycan-Britaniya Hökumətlərarası Komissiyasının növbəti iclasına dair fikir mübadiləsi aparılıb.

Energetika Nazirliyindən “vergiler.az”a verilən məlumata görə, qeyd olunan məsələyə nazir müavini Samir Vəliyevlə Böyük Britaniya Parlamentinin İcmalar Palatasının üzvü, Azərbaycanla parlamentlərarası dostluq qrupunun rəhbəri Bob Bləkmənin rəhbərlik etdiyi nümayəndə heyəti arasında görüş zamanı toxunulub.

Görüşdə enerji sahəsində əməkdaşlıq əlaqələrinin əhəmiyyəti və "bp" şirkətinin ölkənin energetika sektorunda fəaliyyəti qeyd edilib. Şirkət tərəfindən Cəbrayıl rayonunda tikiləcək 240 MVt gücündə günəş elektrik stansiyası layihəsinin bu ərazilərin “yaşıl enerji zonası” kimi inkişafına töhfə verəcəyi ifadə olunub.

Söhbət zamanı, həmçinin, Cənub Qaz Dəhlizinin genişləndirilməsi, təbii qaz təchizatı sahəsində Azərbaycanın Avropanın enerji təhlükəsizliyindəki rolundan bəhs edilib.

Dənizdə külək enerjisi, “yaşıl hidrogen”, enerji səmərəliliyi, karbon emissiyalarının azaldılması və digər sahələrdə əməkdaşlıq imkanları nəzərdən keçirilib.