“Kaspersky” şirkəti insanların kriptovalyutalara münasibəti ilə bağlı araşdırma aparıb. “vergiler.az” şirkətə istinadən xəbər verir ki, 16 ölkədə aparılan sorğu ümumilikdə 12 min insanı əhatə edib.

Respondentlərin təxminən yarısının (48%) qeyri-sabitlikdən qorxaraq rəqəmsal puldan imtina etdiyi məlum olub. Rəyi soruşulanların 10%-i isə artıq aktivlərini itirdiyini və nəticədə investisiyalardan imtina etdiyini açıqlayıblar. Kriptovalyuta sahibi olmayan respondentlərin 61%-i vəsait itirmək riski səbəbindən ondan istifadə etməyi düşünmür.

Respondentlərin 14%-i kriptovalyutanın dəyərinin heç bir maddi aktivlə təmin edilməməsindən narahatdır, 6%-i isə kiberhücumlar nəticəsində şəxsi məlumatların sızması risklərindən qorxur.

“Kriptovalyuta sənayesi nisbətən yeni meydana çıxıb. Təəccüblü deyil ki, əsrlər boyu ənənəvi puldan istifadə edən insanlar hələ də onun innovativ analoqlarına etibar etmirlər. Bununla belə, kriptovalyutaların böyük potensialı var. Kriptovalyuta sahibləri təhlükəsizliyə diqqət yetirməklə maliyyə aktivlərini və şəxsi məlumatlarını itirmək risklərini minimuma endirə və özlərini müvafiq təhlükələrdən qoruya bilərlər. Azərbaycanda bu sahədə hüquqi bazanın hələ formalaşma mərhələsində olduğunu nəzərə alsaq, ikiqat diqqətli olmaq lazımdır”, -”Kaspersky”nin Azərbaycandakı rəsmi nümayəndəsi Müşviq Məmmədov bildirib.

Kriptovalyutaların üstünlüklərindən təhlükəsiz istifadə etmək üçün bunlar tövsiyə edilir:

• hər bir hesab üçün güclü, unikal şifrələrdən istifadə edin, bununla hesabınızın sındırılmasının qarşısını ala bilərsiniz;

• şübhəli e-poçt və linklərdən ehtiyatlı olun: fişinq hücumçularının köməyi ilə təcavüzkarlar qurbanları şəxsi hesab və ya şəxsi məlumatlara giriş üçün hesab məlumatlarını ötürməyə inandırmağa çalışırlar;

• kriptocüzdanınızın kilidini açmaq üçün itifadə etdiyiniz şəxsi açarlarınızı heç kimlə paylaşmayın;

• rəqəmsal savadlılığa diqqət yetirin: mövcud kibertəhlükələrdən və kriptovalyutadan qorunma təcrübələrindən xəbərdar olun. Mümkün aldatma sxemləri haqqında nə qədər çox bilsəniz, onlara qarşı daha yaxşı mübarizə apara biləcəksiniz;

• bütün cihazlarda etibarlı təhlükəsizlik həlli quraşdırın.