2022-ci il ərzində Dövlət Gömrük Komitəsinin (DGK) xətti ilə dövlət büdcəsinə 5 654 602,0 min manat daxil olub ki, bu da 2021-ci illə müqayisədə 30,2 faiz çoxdur.

“vergiler.az”ın Komitənin dərc etdiyi göstəricilər əsasında apardığı hesablamalara görə, hesabat dövründə dövlət büdcəsinə daxil olan gömrük rüsumlarının həcmi 2021-ci illə müqayisədə 17,8 faiz artaraq 1 419 968,7 min manat təşkil edib.

Ötən il ƏDV üzrə daxilolmalar 36,6 faiz artaraq 4 003 423,0 min manata bərabər olub. Aksizlər üzrə daxilolmalar 3,5 faiz artaraq 168 897,2 min manat təşkil edib.

Yol vergisi üzrə daxilolmaların həcmi 62 312,7 min manat olub ki, bu da 2021-ci ilin göstəricisindən 42,8 faiz çoxdur.

2022-ci ilin dekabr ayında DGK xətti ilə dövlət büdcəsinə 565 010,9 min manat həcmində vergi və rüsumlar daxil olub ki, bu da 2021-ci ilin eyni ayı ilə müqayisədə 31,3 faiz, 2022-ci ilin noyabr ayı ilə müqayisədə isə 27,6 faiz çoxdur.

Ötən ilin dekabrında dövlət büdcəsinə daxil olan gömrük rüsumlarının həcmi 2021-ci ilin dekabr ayının göstəricisi ilə müqayisədə 31,3 faiz artaraq 158 955,2 min manat olub. 2022-ci ilin noyabr ayı ilə müqayisədə isə 28,4 faiz artım qeydə alınıb.

Həmçinin, 2022-ci ilin dekabr ayı ərzində ƏDV üzrə daxilolmalar 2021-ci ilin eyni ayı ilə müqayisədə 44,6 faiz artaraq 382 007,1 min manat (2022-ci ilin noyabr ayı ilə müqayisədə 28 faiz çox), aksizlər üzrə 14,5 faiz artaraq 19 082,1 min manat (2022-ci ilin noyabrı ilə müqayisədə 20,2 faiz çox), yol vergisi üzrə daxilolmalar isə 2021-ci ilin dekabr ayına nisbətdə 35,5 artaraq 4 966,5 min manat (2022-ci ilin noyabrı ilə müqayisədə 4,7 faiz az) təşkil edib.