Azərbaycan son vaxtlar Avropa İttifaqına təbii qaz ixracatını ən çox artıran ölkədir. Bu fikri millət vəkili Vüqar Bayramov səsləndirib. O, qeyd edib ki, bu ilin ilk 5 ayında Azərbaycan Avropaya qaz ixracatını əvvəlki ilin eyni dövrü ilə müqayisədə 2,2 dəfə artıraq 2,1 milyard kubmetrdən 4,5 milyard kubmetrə çatdırıb: “Bu müddətdə ölkəmizdə 19,6 milyard kubmetr təbii qaz hasil edilib ki, bu da 2021-ci ilin eyni dövrü ilə müqayisədə 14 faiz artım deməkdir”.

Millət vəkili vurğulayıb ki, ilk beş ayın nəticələrinə görə Avropanın, eləcə də regionun enerji təhlükəsizliyində Azərbaycanın rolu artmaqdadır. 2020-ci ilin dekabrından sonra Azərbaycan Avropaya 11 milyard kub metrdən çox təbii qaz nəql edib. “Ötən il 43,9 milyard kubmetr qaz hasilat edən ölkəmizdə istehsalın bu il artacağı gözlənilir. Avropa İttifaqının enerji təhlükəsizliyində Azərbaycanın rolunun artması ölkənin regional geosiyasi mövqeyin daha gücləndirir”, - V.Bayramov bildirib.